中環出更：外國遊樂設施豐富 張國鈞囡囡樂而忘返
香港嘅公園千篇一律，幾乎每個公園嘅玩樂設施都一樣，安全為主，樂趣為次，所以不時聽到小朋友投訴唔好玩。卓妮尋日就見到唔少家長，好似立法會議員張國鈞（Horace）就話小朋友有得跑就開心，但兩個囡囡喺外國公園玩更加會玩到唔捨得走，到底有乜嘢咁特別呢？
Horace就話同兩個囡囡去旅行最緊要安排去當地免費公園玩，因為佢哋玩到天黑先肯走，佢又可以趁機偷師當地公園嘅優點。佢就話帶過囡囡去日本同澳洲嘅公園玩，直言設施安全系數高未見過有人受傷，所以滑梯有一樓咁高都好放心。佢認為小朋友應該多去公園玩，因為成班人一齊玩學習到溝通，仲會識得互相遷就喇。
尋日嘅活動場地內有一個名為捐山窿公園，齋聽個名都知零舍唔同，所以吸引到中西區區議會正副主席葉永成同陳學鋒、海濱事務委員會主席吳永順、離島區區議會副主席余漢坤同中西區青年活動委員會副主席林月萍等去觀摩。
陳學鋒：香港嘅公園趣味欠奉
陳學鋒就話最懷念細個爬鋼架同捉迷藏，不過好長嘅滑梯就一般，因為滑梯用鐵造，夏天時玩會好辣手咁話。佢認為依家香港嘅公園只着重奔跑空間，忽略咗手部肌肉嘅訓練，而且設施欠奉趣味，好似韆鞦都變晒尿片款，大過兩歲都玩唔到，搞到小朋友好無癮。
本身係建築師嘅吳永順就慨嘆，任何設計有太多顧忌，結果一定會悶，因為好玩就一定會有風險，所以要睇點樣控制風險，而小朋友喺撞碰之下都會有所成長。
卓妮