政情：葉劉生日被嘲「挾洋自重」 網民：幾時壽終正寢
生日原本應該係一個高興嘅日子，如果惹嚟罵戰就真係唔多高興喇。立法會議員葉劉淑儀（葉劉）日前喺社交網站上載一張眾人同佢慶祝生日嘅照片，相中人以外國人居多，皆因葉劉去咗美國外訪，當時正身處美國蒙大拿州，唔同國家嘅議員、智庫總裁等知道佢生日，就提早準備咗一個朱古力生日蛋糕同佢慶祝。不過點知呢張相就惹來網民罵戰，有網民問葉劉幾時壽終正寢，唔少網民見到都反擊有關言論。
質疑點解喺外國慶祝
葉劉上載該張照片後惹來網民質疑，有人問佢點解要去外國慶祝生日，指摘佢「挾洋自重」，有網民更問佢幾時壽終正寢，相當唔客氣。葉劉亦有回覆反駁，指其生日正日會喺香港過，又反問網民︰「你把口為何咁毒？你讀過書知道甚麼是禮貌嗎？」
部分網民見到咁不客氣嘅言論，都有幫葉劉反擊，批評對方冇禮貌，亦有人叫葉劉唔使理呢啲留言，直接屏蔽舉報。估唔到一個生日貼文都可以引起罵戰，唔知對葉劉慶祝生日嘅心情有冇影響呢？