政情：太太術後留院 蕭偉強病房陪慶生
前排經常見到勞工及福利局前局長蕭偉強喺Facebook上載周圍去旅行嘅相，同太太大晒恩愛，點知太太生日，竟然一家人要喺醫院慶祝喎。發生乜嘢事？
話說蕭偉強日前喺Facebook貼文話同阿仔、女兒及新抱為太太慶祝生日，意想不到嘅場景竟然係喺病房，而意想不到嘅窩心，係女兒秘密地為媽媽送來佢康復中最期望嘅美食，係乜嘢？原來係雪糕蛋糕。
睇到佢話喺病房，又話太太康復中，好多網友就好關心咁問發生乜嘢事？蕭偉強回覆話，喺幾星期前太太左腳做咗手術，應該要留院多幾個星期先康復嘞！聽到佢咁講，好多網友即刻放心晒，仲祝佢太太生日快樂同早日康復添！
嘆社會滿仇恨 「本來是家人」
蕭偉強話呢晚係近幾星期唯一冇催淚煙嘅周末，而周日嘅示威亦大致回復香港原有嘅和平理性。佢仲有感而發，話「何必互相仇恨，何需武力相持，我們本來就是家人。只需展現公正，只求查找真相，就可修築共議平台，我們原來就是如此文明。」