政情：梁美芬咬住唔放 要通識科轉選修
教育局成立的學校課程檢討專責小組早前發表諮詢文件，建議中學文憑試（DSE）通識科維持必修必考，惹起立法會議員梁美芬好不滿，佢尋日再次建議將通識科改為選修科、考試不要設必答題，同埋師資須經過質素確認，仲要落實專科專教，增加香港同內地或海外青年交流機會。
指課程出現偏頗
梁美芬所屬嘅政黨尋日向政府提交有關施政報告嘅建議，梁美芬話收到唔少有關通識科課程嘅問題，認為當中唔少課程出現偏頗，而且唔適合高中學生，未來亦會向教育局反映問題。睇嚟佢真係咬住通識科唔放，肯定唔會畀教育局局長楊潤雄側側膊。
其實，佢早前都批評喺過去十年，政府都冇理會佢提出有關通識科嘅意見，而課程檢討報告中亦冇考慮佢嘅意見，仲話佢要聽到嘅係教育局誠意聽取民意添！提咗十年意見，政府都唔聽，又難怪佢火滾嘅。