政情：太空館上演激光騷 梁偉明讚市民有創意
近期觀星筆大賣，早前更有大批網民趁七夕，去太空館外觀星，更當太空館嘅菠蘿包外牆係螢幕，上演咗一整晚嘅激光匯演，搞到太空館館長梁偉明都讚市民有創意添！
梁偉明就話當日嘅觀星活動自己唔在場，但笑指市民好有創意咁自由發揮。似乎都幾欣賞喎，咁會唔會啟發到佢為「菠蘿包」加添色彩呢？佢就話唔會喇，始終觀星筆都係用作觀星較合適。
身為太空館館長 留意天文現象
講起觀星，佢話作為太空館館長都要留意天文現象，適時安排活動去推廣天文畀市民，而佢個人就對北極光有興趣，但一直未有機會喎。
佢透露啱啱由俄羅斯返港，但呢個季節去無機會欣賞到北極光，而且所去嘅莫斯科同聖彼得堡嘅緯度未夠高，要去較高緯度嘅北極圈先機會大囉。不過，佢話有例外，只要太陽活動夠活躍，就會連相對低緯度嘅地方都有機會睇到北極光，難怪咁多人話睇北極光都要靠運氣喇！