中環出更：「跟我返屋企」黃錦星整喊BB女
向來注重環保嘅環境局局長黃錦星尋日出席一個環保活動時，同一班小朋友互動大玩小遊戲非常受歡迎，但臨走時竟然整喊一名兩歲大嘅BB女，認真失威！
話說黃錦星同班小朋友一齊縫製大嘥鬼公仔，見到隔籬個BB女好得意，於是就主動撩佢玩，問完BB女怕唔怕陌生人後，就將BB女抱起，罕有地喺鏡頭前慈父上身。黃錦星坦言好耐無抱過咁細個嘅BB女，仲自誇無生疏依然熟手喎，望落真係有板有眼，BB女坐喺佢大髀幾分鐘都無扭計，黃錦星仲用大嘥鬼氹到BB女大笑添！
臨走食多次檸檬
不過，當黃錦星同BB女講「跟我返屋企」之後，BB女就立即變面喊咗出嚟，要媽咪抱先平靜番。而黃錦星就出動私伙，一條全新嘅大嘥鬼手巾幫手抹眼淚，到臨走再問BB女「仲畀唔畀我抱」，但今次就慘食檸檬，BB女當堂搖晒頭，睇嚟黃錦星真係唔適合做拐子佬喇！
卓妮