中環出更：應付職場競爭 又要迎合傳統 林珍真：喺香港做女人唔易
香港婦女地位日漸提升，各行各業都有女強人，然而女性亦要承受唔少壓力，以致情緒波動損害精神健康。舞台劇導演林珍真話婦女既要應付職場上嘅競爭，又要迎合社會嘅傳統觀念，形同活喺人家所設置嘅框框之內，所以喺香港做女人，並唔容易。
林珍真日前出席紫荊青年商會舉辦有關女性精神健康嘅活動。佢話溫柔婉約同體貼入微，原本就係女性嘅本質，然而經過職場嘅磨練，在職女性往往變得好似男性咁硬朗同霸氣。另一方面，華人社會又會將婦女標籤同定型，譬如蔑視婚後不育嘅婦女，又譏諷嫁杏無期者為「剩女」。佢認為一眾姊妹不妨跳出外界所塑造嘅角色框架，嘗試實踐自己嘅理想。
原本喺外國攻讀戲劇嘅佢，學成之後為咗謀生，曾做過同戲劇無關嘅工作，但後來為咗追夢，最終都係全職投入戲劇嘅懷抱。佢話一想到自己實現夢想嘅努力，將來會成為女兒嘅榜樣，好多精神壓力都會因此而化解。
浩洋青年商會前會長譚麗時過去曾因拍拖五年嘅男友提出分手，令佢大受打擊以致患上情緒病需住院治療。後來佢加入青商會，社交圈子大為擴闊，並喺友儕嘅鼓勵下多方嘗試激發自己嘅潛能，令佢明白到喺人生當中，仲有好多值得追尋嘅理想同目標。
姚顥頤：做運動消解精神壓力
紫荊青年商會會長姚顥頤及同心圓系列2019籌委會主席鄧樂欣都在場。姚顥頤話如果一至三個月內經常出現心悸、流汗、失眠同情緒低落，就可能係精神健康響起警號。從事保險業嘅佢都不時面對「跑數」嘅壓力，所以佢會透過做運動，或者約姊妹見面傾訴一下，以消解精神壓力。
國際青年商會香港總會會長連冠豪就話太太喺分娩之後就辭去工作以照顧新生命，導致同過去專注於事業嘅生活模式完全割裂，佢話希望小朋友將來入學之後，太太有機會重投職場，就可重拾往日嘅生活同社交圈子。
卓妮