政情：問責官員落區視察 全程齋跟如布景板
政府為咗回應社會訴求，宣布構建溝通平台，同日下晝有官員開始同第一批「有心人」直接對話。立法會議員柯創盛（柯仔）尋日同運輸及房屋局副局長蘇偉文落觀塘行街，另一邊九龍城區議會主席潘國華就帶食物及衞生局局長陳肇始同副局長徐德義落區巡視，局長們全程只係跟住行，十足布景板咁。
陳肇始淨答：好，知道，理解
柯仔喺社交平台直播，巡視途中佢就交通同社區建設提出建議，並且追問東九龍鐵路線嘅情況，蘇偉文就淨係回答：「會跟進。」但柯仔話其實相關問題已經向政府部門提出多次，但政府愛理不理或者話無力解決，最後佢勸政府官員要接地氣呀！
另外，潘國華等人帶陳肇始行遍區內大街小巷，希望可以喺街道衞生同商戶經營上搵到平行點，但係陳肇始除咗「好，知道，理解」冇其他回應，跟住因為時間關係走埋，只能將個波交畀徐德義，本身做醫生嘅徐德義見到污漬同冷氣機滴水就好似好驚訝，可能醫院太乾淨，唔係太習慣啩！