政情：前高官蘇家碧 明年初離任港鐵
港鐵有人事變動！港鐵尋日公布蘇家碧（Linda）辭任公司事務總監、執行總監會成員同企業責任委員會成員，明年一月十六日起生效。據了解，Linda喺上月中已遞辭職信，希望可以嘗試吓其他嘅工作。
工作四年 火頭處處
Linda離開官場前，官至商務及經濟發展局副秘書長，之後做過香港工業總會行政總裁，喺一五年九月中正式出任港鐵公司事務總監，但甫上任就遇到好多棘手問題，唔單止要處理港鐵經常發生故障同甩漏、高鐵工程超支大黑洞等，仲要處理攜帶大型樂器嘅爭議，搞到佢未坐定就要四出解畫，而佢喺港鐵工作近四年間，沙中線亦被揭發連串失誤，確實火頭處處。
據了解，Linda亦覺得港鐵喺處理某啲問題係比較困難，因為外界覺得港鐵係公營機構，但實質係上市公司，要完全滿足公眾嘅期望比較難。話說佢離開港鐵係要迎接其他機遇，究竟會有乜嘢新動向？大家就要拭目以待嘞！