政情：嘆細時冇咁多嘢玩 曾智明最多游吓水
依家嘅學生哥暑期活動多多，甚至仲可以一嘗做太空人嘅滋味。尋日香港太空館舉辦嘅「少年太空人體驗營」就搞咗個分享會，香港中華總商會副會長曾智明都有出席。佢就話，學生參加呢個活動唔止喺航天知識上有所得着，亦都可以體驗到航天員刻苦耐勞嘅訓練，從中學習堅毅不屈嘅精神。佢仲慨嘆細個時冇咁多活動玩，最多都係打吓乒乓波同游水，唔似得依家可以周圍去交流咁話。
原來今次嘅體驗營都有小插曲，曾智明話，學生喺旅途上遇到阻礙，皆因佢哋喺內地等候轉機期間，有一半學生都因為天氣唔好而滯留機場，錯過部分行程，亦去唔到某啲景點參觀。不過佢就認為，呢啲小困難都係一種經驗，學生會「賺」咗呢次經驗，唔會影響追求學習嘅決心。
好怕坐飛機 唔鍾意等
曾智明又提到自己好怕坐飛機，不過就唔係唔鍾意坐飛機，而係唔鍾意嘥時間去等，所以佢等上機時就會玩手機遊戲消磨時間。佢又話，都會留意年輕人玩乜嘢遊戲，否則好難同佢哋溝通喎。