政情：入境美國搞2粒半鐘 鍾國斌呻：都係香港有效率
立法會議員不時都會應邀去世界各地唔同地方進行公務外訪，而呢幾日剛好有六名議員應美國國務院邀請，到當地出席首次舉行嘅《香港-美國立法機關交流團》。紡織及製衣界鍾國斌（Felix）都有份出席今次交流團，但喺飛去美國期間卻一波幾折，搞到上唔到飛機！
足足26句鐘先抵埗
Felix最新喺社交網站上載幾張相，見到開會場地風景宜人，綠草如茵，睇到都覺得心情輕鬆晒！大會又專程喺會議門口貼出一張印有大家名嘅名單歡迎出席會議添。但Felix就話，自己喺香港時間本周一早上八點，喺屋企出門口，去到美國蒙大拿州足足要廿六個鐘，期間喺三藩市舊金山國際機場都搞咗兩個半鐘，令到佢趕唔切轉機，大呻去到外國先發現香港好有效率，叫大家要好好珍惜啊！
