中環出更：原訪上海三日 鄭若驊突回港耐人尋味
香港立立亂，四處都係火頭，近來仲不時發生血案，執法部門同律政司應該忙到一頭煙，而屢爆醜聞、「民望墊司底」嘅律政司司長鄭若驊就喺周日離港進行一連三日外訪。至周一深夜，鄭若驊突然提早返香港，話要處理公務，整件事變得耐人尋味，到底有乜嘢公務必須「急召」佢回港呢？
話說周日早上，鄭若驊疑似知道自己喺風頭火勢時走咗去唔係咁好，喺機場會見傳媒時，首先講依家香港面對艱難時期，律政司要做好工作外，仲要努力推廣香港嘅法律及爭議解決服務，希望令香港的競爭力增強。而佢今次到訪上海，唔單止會見當地政府官員，仲話會推廣一個律政司創造嘅品牌，就係「調解為先」承諾書系列活動喎。
四處推銷調解 惹人詬病
本來以為佢會留喺上海足三日，點知政府新聞處喺周一晚發新聞稿交代鄭若驊訪問上海行程時，最後一段話佢已經返咗香港嘞！鄭若驊做司長前，調解就係佢專業，依家經常代表香港去四周圍推銷調解，早被人詬病，今次外訪突然提早返港，唔通係律政司內部有重大決定？
卓妮