中環出更：地貧症遺傳下一代 馬廖千睿：勿掉以輕心
地中海貧血症困擾唔少香港人，而地中海貧血兒童基金（基金）董事會成員馬廖千睿同丈夫馬豪輝都係呢個病症嘅隱性患者，儘管對生活無甚妨礙，但地中海貧血嘅遺傳基因會影響下一代，絕對唔可以掉以輕心。
馬廖千睿尋日聯同地中海貧血兒童基金主席以及其他董事局成員，出席一項善款捐贈儀式。佢話曾經想生多幾個小朋友，然而生咗長女後，餘下胎兒均屬早夭。初時佢唔知原因，直至一位血科教授幫佢驗血同驗羊水，先知自己係地中海貧血症嘅患者，從而中止懷孕，以免誕下遭遺傳病纏繞嘅新生命。
佢又話一向活得健康，但礙於紅血球較少，帶氧量亦較少，唔單止比較易攰，亦較其他人容易有高山反應。佢唔單止身體力行加入基金，更將出版食譜所得嘅收益全數捐畀基金，務求更多患者可以受惠。
重型患者多為跨境婚姻子女
基金主席馬紹鈞醫生話香港每十一個人，就有一個係呢個病嘅輕度（隱性）患者，由於相當多港人都會進行婚前檢查，誕下重型地中海貧血症患者嘅機會極微，而本地嘅重型患者則以跨境婚姻所生嘅子女居多。佢話雖然目前重型患者為數約三百人左右，但基金方面都會嘗試盡一切努力，期望患者嘅生活得到改善之餘，亦得到根治病症嘅良方妙藥。
捐助基金四十五萬元善款嘅，係一個三人家庭上個月喺瓊州海峽完成接力渡海泳而籌得。渡海泳第一棒嘅何婉儀話舊年就有計劃聯同老公及囡囡嚟一場渡海泳壯舉，由於基金主席係佢嘅舊同學，於是佢就趁機籌募善款，結果遠至巴西同俄羅斯都有人慷慨解囊。
卓妮