政情：唱歌唔練氣 楊立門：我唔係男高音
有「AO歌王」之稱嘅民政事務局前常任秘書長楊立門（Raymond）自從離開政府後，不時都有表演唱歌。佢尋日出席一個活動時就話自己唱歌唔使練氣，因為唔係男高音，又唔使跳舞，頂多都係行嚟行去喎。其實就算唔係男高音，唱歌都要用唔少氣，似乎係Raymond天生底子好喇。
最驚傷風咳鼻敏感
雖然Raymond話唔使練氣，但佢對養聲都有一套心得。佢話，平時要小心唔好亂食嘢，煎炸嘢就食少啲，而多做運動都係必須嘅，佢平時就會打乒乓波、做吓舉重，保持身體質素好，唱歌就自然會通咁話。不過佢就提到，唱歌嘅人最驚嘅其實係染上傷風咳同鼻敏感，因為如果咳嘅話，就會唱唔到歌，所以佢平日見到有人傷風，都會行開啲，以免被傳染。
佢又話，依家都有一批歌迷不時去聽佢唱歌o架，有時都會搵佢簽名，啲歌迷通常都唔係少女，因為自己唱開老歌，市場都唔係少女喎。