近期大家嘅心情沉重，不過唔使驚，黑夜過後總會見到晨曦，如果仲未可以平復到心情，仲係覺得憂心忡忡，一於嚟欣賞一下呢位可愛又甜美嘅小天使高崎佳奈美，必定令你煩惱全消！
師傅教落拳頭不打笑面人，又有云笑一笑世界更美妙，多啲笑面迎人留番個好印象，同人相處都會特別融洽，其他人都會對你特別親切同照顧。而日本寫真女郎如果笑容甜美，又成日展露笑容，感覺都特別討好，就好似高崎佳奈美咁喇！
今年22歲嘅高崎佳奈美青春可人，五官標致，單係俏面已經予人深刻印象，而阿妹最令人難以忘懷嘅絕對係充滿治愈能量嘅甜美笑容，男人見到會覺得窩心溫暖兼煩惱全消。至於身材方面，更係令人精神一振，一來皮膚夠嫩白，二來纖巧得嚟上圍亦分量十足，認真嗒得杯落！
當年佳奈美就讀一間藝能訓練學校，一心諗住喺藝能界發光發熱，由於阿妹長得一副標致面孔，後來成為時尚雜誌《CHOKi×CHOKi GiRLS》嘅專屬模特兒，點知雜誌喺2016年停刊，搞到佳奈美一時之間發展失去方向，真係陰功豬！
及後，經理人推薦佢參加上年舉辦嘅選美活動「Sanpo GoGo Queen Audition」，結果成功奪得第一屆冠軍，今年更蟬聯冠軍寶座，足見實力強勁，同時令佢嘅藝能事業再次起飛，猶如重獲新生，難怪阿妹會咁開心，經常開懷大笑喇！由於佳奈美嘅笑容如此令人難忘，寫真業界更稱佢為「平成最後之天使、令和最初之天使」，唔知大家認唔認同呢？
簡介：高崎佳奈美除咗勤力工作，同大家分享生活點滴以及工作情況亦不遺餘力，如果想知道阿妹嘅最新動向，就要意留佢嘅社交網喇！
網址：https://twitter.com/kanami_takasaki
年齡：22歲
身高：5呎3吋
三圍：33C-23-31
撰文：賢