政情：周啟良貪靚愛整齊 細細個已去洋服店做衫
貿易發展局日前搞咗個香港時裝展，場內見到有份策劃統籌活動嘅貿發局副總裁周啟良。原來周細細個已經會去洋服舖做衫褲，問到佢對時裝有乜嘢心得，佢就話自細已經好鍾意靚嘅嘢同愛整齊，所以對自己外表都好有要求。
專登做條喇叭褲襯衫
佢話，記得細個嘅時候，媽媽已經會帶佢去洋服舖做衫褲，印象最深刻嘅就係當時歐洲風盛行，所以試過專登做條喇叭褲襯番件關刀領恤衫，仲會不時去理髮店吹個蛋撻頭，直言咁先夠型仔。佢又話，因為鍾意整齊，由細到大對自己都有唔少幫助，出親街都會着得整齊啲，咁就可以畀人感覺到光鮮舒服嘅感覺，而工作方面，佢就無論係喺文書上或擺放上，都可以做到整整齊齊，咁就算再忙，工作都可以得心應手咁話。
佢仲話，雖然依家興懷舊，但唔可以將三十年前嘅設計就咁攞出嚟着上身，仲需要加入多啲新元素落去，咁樣先至吸引。咁有心得，唔怪得每次見親佢都咁靚仔啦。