政情：郭偉强「不回應機械人」 網民寸爆唔識玩Fb
近年社交媒體興起，唔少立法會議員同區議員都喺社交網站Facebook（Fb）開專頁交代工作動向兼同網民交流一下。立法會議員郭偉强前日就喺Fb話因為寫工作報告而好頭痕。點知就被網民挑機，仲寸佢唔識玩Fb，要上堂添。
最近社會紛亂，元朗、北角、荃灣都發生過白衣人打人事件。身兼東區區議員嘅郭就被網民留言要求佢回應北角嘅事件。不過郭就喺留言中話自己唔回應機械人，又話啲帳戶係冇歷史，結果就被網民鬧爆，話係啲用戶校咗私隱設定，質疑郭唔識用Fb，仲寸爆咁叫郭所屬嘅工聯會搞番個有關用Fb嘅課程，唔好出醜咁話。
預咗持相反意見嘅人挑機
郭回應查詢時話，唔能夠期望取悅到所有人，同埋都預咗持相反意見嘅人挑機，認為應該將時間用喺有意義嘅地方。至於佢份工作報告嘅進度，佢就話頭痕在要整理資料、排次序等，一般都要花兩個月，今次呢份就整理好晒資料，預計今個月內出街，佢仲透露份報告會寫少少政治議題添。