政情：今日你上鏡：美食展大顯身手 徐德義煮出少糖少鹽佳餚
今時今日大家都愈來愈注重健康，咁究竟點先可以食得健康呢？ 本身係醫生嘅食物及衞生局副局長徐德義都好注重健康，尋日就喺美食博覽大展身手，同日本名廚田村隆喺一個主題為「少鹽少糖，創意無限」嘅烹飪示範活動上，烹調少鹽少糖嘅美味菜式，以鼓勵市民學習發揮創意，善用天然食材同小量嘅鹽同糖去煮出佳餚。唔知徐平時喺屋企又會唔會都煮番幾味呢？
望達致全城減鹽減糖
呢個活動其實係由食衞局、食物環境衞生署食物安全中心、降低食物中鹽和糖委員會，聯同香港貿易發展局合辦嘅，目的都係推廣健康飲食潮流文化。徐德義尋日仲畀貼士大家，話攝取過量嘅鹽同糖會增加患上高血壓、中風同心血管疾病等慢性病風險，所以政府都好希望可以透過同業界、市民共同努力，達致全城減鹽減糖咁話。