中環出更：拒延舊制公務員退休年齡 何啟明轟羅智光卸責羅致光
政府近年鼓勵退休人士再就業，去年就對公務員推出選擇延長退休方案，不過喺二○○○年六月一日前入職嘅公務員就冇份。勞工界立法會議員何啟明對此不滿，尋日佢就話政府對舊制公務員仍然以六十歲退休為目標，等同逼佢哋或需以低價轉投其他勞動市場，直斥政府係將問題由「一個羅智光（公務員事務局局長）推畀另一個羅致光（勞工及福利局局長）。」
指公務員係重要資產 不應浪費
公務員事務局尋日畀立法會嘅文件就對早前會上通過嘅一個有關改善公務員待遇嘅議案作回應，當中提到○○年六月起至一五年五月底入職嘅文職及紀律部隊職系公務員可選擇分別延至六十五歲及六十歲退休。○○年六月前入職嘅，雖未來十年左右就到退休年齡，但就冇充分理據有一樣的安排，原因包括部門未必有足夠時間就人力規劃作相應調整、對晉升及健康更替造成阻礙等，當局要避免呢啲情況出現喎。
何啟明就話，政府早前提高申領長者綜援合資格年齡至六十五歲，鼓勵六十至六十四歲人士就業，但依家政府自己都唔行先一步係講唔通，批評政府變相將問題由「一個羅智光推畀另一個羅致光」。佢又話公務員係政府重要資產，唔應該浪費人力資源咁話。
卓妮