中環出更：飲食業經營之苦 周潔冰：升降機成煩惱
香港經營飲食業相當艱難，飽受租金高昂之苦，仲要面對各種大大小小嘅難題，好似升降機咁，竟然都可以係食肆嘅煩惱。灣仔區議會副主席周潔冰日前出席一個有關灣仔飲食文化嘅活動時就話有食肆被升降機問題難倒。皆因天后有間酒樓嘅樓上係住宅，大廈居民擔心如酒樓可使用升降機，會令太多街外人出入大廈，所以就唔畀升降機停喺酒樓樓層，認真難搞。
周潔冰話香港有唔少商住樓宇，呢間酒樓位處嘅大廈就係其中之一，既然用唔到原有升降機，酒樓就想自費安裝另一部升降機以方便長者，雖然已獲有關部門通過，解決到技術問題，但大廈居民最終都因為唔想太多閒雜人等出入而唔允許。聽落公說公有理，婆說婆有理，真係好兩難。
龐朝輝嘆食肆貴租難捱
灣仔區議員伍婉婷亦都話灣仔租金貴，有啲食肆都捱唔住要結業。大坑就有間粥店好有人情味，佢都成日去買嘢食，有時就算路過，間舖頭都會請佢飲豆漿，不過後來都因為租金太貴做唔住，好彩間粥店關門一年後，喺附近搵到新舖位重開，不過價格都有調整喇。香港眼科學會前會長龐朝輝就話，其實唔少餐廳為咗捱得住貴租，都要轉型同加價，否則就會好難生存。佢又提起有時都會帶兩個女兒去茶餐廳，女兒要飲鮮奶，不過並非間間都有，如果冇嘅話，女兒就會唔開心喎。
同場仲有飲食旅遊作家歐陽應霽（阿齋）。 阿齋話有啲食肆喺米芝蓮等評分制度下獲得高分後，就會有好多人光顧，但呢啲食肆往往冇能力應付大量客人，結果無論喺香港或台灣，都有部分食肆獲高分後水準下滑，結果令佢唔敢去，真係好可惜呀。
卓妮