政情：警方退沙田4個通訊群組 另覓渠道保持溝通
近月反修例風波持續，其中沙田區喺上月中反修例遊行後，警民發生激烈衝突，事隔大約一個月後，有沙田區區議員尋日喺社交網站貼文，話警方代表突然集體退出同區議員嘅沙田警民關係組資訊群組。據了解，有警務人員認為呢個平台近日失去意義同功能，所以退出，佢哋會繼續同社區持份者積極溝通，會用其他渠道包括電郵電話等方式交流，聆聽持份者嘅聲音。
博康選區區議員趙柱幫喺社交網站上載資訊群組嘅對話，指警方喺群組留言「為達至更有效及清晰的溝通，日後所有查詢請以書面方式提出。此群組將會關閉。」趙柱幫留言話「資訊群組已被警方解散了」。 趙柱幫覺得警方呢個舉動好情緒化同好唔專業，又話即使民主派區議員不滿警方執法，但係佢哋都冇「退群」，因為呢個係一個溝通嘅橋樑。
區議員：對警民衝突有分歧
大水坑選區區議員容溟舟坦言所有警方代表全部退出沙田四個資訊群組，佢話成立初期大家關係都好好，但其他議員因為同警方就警民衝突呢個話題睇法唔同，再加上各有各講，因而加深咗群組唔良好嘅氣氛。