政情：撐塞爆機場 黃子悅自食苦果
反對《逃犯條例》修訂引起嘅連串風波蔓延各區，近日戰區就嚟到機場，有網民發起「萬民接機」活動，已連續幾日喺機場集會，前日甚至塞爆機場，一度令機場癱瘓，而尋日網民就再接再厲，繼續發起塞爆機場，搞到唔少旅客受到影響，其中曾於違法佔領行動期間絕食嘅前學民思潮發言人黃子悅亦都支持塞爆，仲喺社交網站大讚「Good job（做得好）」！
航班取消 滯留多哈
黃雖然口講支持，但就冇現身機場，原來佢都係受害者，人在外地，返唔到香港。黃喺社交網站貼咗張圖，顯示咗幾班由多哈返回香港嘅航班都已取消，換言之佢依家正身處卡塔爾首都多哈，所以佢大讚「萬人接機」活動嘅同時，都落咗個hashtag話︰「但都係好想翻（返）香港」，心情睇落好矛盾喎。
有網民見狀就建議黃改機票，例如去澳門、深圳等，再轉乘其他交通工具返香港，亦都有網民呼籲「發起萬人兵迎接娘娘」，不過就唔知係真心想迎接黃返香港，定係借機再叫人去塞爆機場喇。