政情：立會大樓復修銅牆鐵壁變堡壘防衝擊

立法會大樓自七一起就變成頹垣敗瓦，行管會已開過幾次特別會議商討善後工作，上月尾嘅會議就講咗以十月中完成復修同復會做目標，當時就估計維修費介乎四千至五千萬元，部分費用由政府承擔，部分就先由行管會營運儲備支付，再經立法會秘書處同保險公司索償，有需要會向政府申請撥款。

玻璃門封閉 部分門改裝牆

行管會主席梁君彥尋日喺會議後會見傳媒，話會上聽咗建築署匯報大樓嘅復修情況，而行管會都同意建築署所提出嘅幾項改動建議。佢講到，嗰幾項嘅改動係將議員入口二，面向馬路嘅玻璃門封閉。呢扇玻璃門就係七一當日遭示威者攻擊嘅對象，最後示威者更成功撞破，但佢就話呢個改動係為咗更加歸一喎。

另外，梁君彥又話會喺添美道上植樹以加強保安，而大樓內有部分門係多餘，未來會將呢啲門拆卸改為玻璃牆，至於面向立法會示威區嘅入口都會考慮改動。

有人直接問係咪想將立法會變成堡壘，但梁君彥當然否認，解釋行管會作為大樓管理人同僱主，要提供安全環境畀大樓使用者同立法會秘書處職員工作，同時都要確保出席立法會會議嘅公眾人士同埋傳媒。不過，佢所講嘅改動都好似純為加強保安，圍封立法會，唔係點會連植樹呢類綠化工作，都講成為安全同加強保安呢，所以現時予人感覺立法會係怕咗示威者同衝擊，將大樓變成堡壘都好正常囉！

現時距離立法會十月中復會仲有兩個月時間，梁君彥就話仍然以呢個時間作為目標，但坦言面對緊挑戰，因為大樓內尤其內部系統嘅破壞好大，需要時間購買器材，之後仲要進行長時間測試，希望十月時社會可以平靜落嚟，令到立法會可以照平常咁復會喎。