中環出更：失明者觸感觀星張鳳秋大開眼界
失明人士能夠同視力正常嘅天文愛好者一齊仰望星空，並唔係無可能。國際獅子總會每年都會訂下環保、飢餓同視力等全球性策略目標服務，畀各區嘅屬會有所依循。國際獅子總會中國港澳303區日前舉行新年度區職員暨屬會職員就職晚會，出席嘅九龍塘獅子會前會長張鳳秋曾為達成「視力」呢項服務，同其他組織協辦「盲人觀星傷健營」，見識到以另類方法去領略浩瀚星空。
張鳳秋話失明人士因為無法靠肉眼觀星，觸感就成為主要嘅手段，因此需要使用凸點星圖，觸感星座圖案同凹凸月面圖畀失明人士知悉月面特徵，而義工又會幫手，用手指喺失明人士嘅手背上點畫星座輪廓，然後再告知該星座位處面前幾點鐘嘅位置。佢話失明人士雖無法一睹壯麗星空，但至少可透過講解同觸感，將遼闊銀河同滿天星宿都構築喺腦海當中。
王恭浩借「模擬人生」 令青少年堅韌
講起獅子會嘅公益服務，新任嘅港澳303區總監王恭浩就銳意發展多項青少年服務，唔單止組織三人籃球賽，又藉九型人格測試以配對合適嘅職業同埋借鑑電玩嘅「模擬」系列，兩日一夜嘅人生之旅體驗營，參加者將安排由領取出世紙開始，經歷讀書搵工、結婚置業同投資，以及選舉等人生歷程之外，又會加入沙士疫情、股災同樓巿崩盤等危機，務求青少年將來縱使遇上高低起跌嘅際遇，亦可以坦然面對。
傑出青年協會前主席余嫿亦有嚟撐場，佢話新人事新氣象，王恭浩要求佢發揮時裝設計師嘅專長，為獅子會303區設計一系列領呔，絲巾同polo恤，而余嫿就以港人舞獅所用嘅獅子頭作為港澳區會嘅新會徽，好多人見過之後，都盛讚彰顯本地特色咁話。
卓妮