政情：高松傑食完催淚煙 呼籲後生仔停一停
深水埗人多車多，星期日仲會逼爆，但係前日深水埗有示威遊行，基本封晒路，成個死城咁。菁英會副秘書長高松傑住喺深水埗，嗰日仲落咗街影示威者整路障，咁啱遇着警察放催淚彈驅趕示威者，唔小心吸咗兩啖之後有感而發。
高松傑話吸入催淚煙後，雙眼完全擘唔開，仲係示威者幫佢用水濕咗對眼之後就開始好啲嘞！坊間傳言，話「食過催淚煙，先係一個真正嘅香港人」，高松傑話今次終於見證到啦！
奉勸諗吓係咪對香港好
佢仲講笑咁話自己本來喉嚨有好多痰，吸完催淚煙後咳咗幾下，反而扯晒啲痰出嚟好咗好多添！但係開完玩笑之後，佢就呼籲後生仔要停一停、諗一諗，話一方面好明白大家有權去爭取自己想要嘅嘢，但另一方面，非法集會阻到人，會影響街坊做生意。佢仲話年輕人前途一片光明，奉勸年輕人諗吓咁樣做其實係對香港好，定係破壞緊香港呢？