政情：囝囝玩人體藝術 陳家珮痛失心愛唇膏

話說Judy日前喺社交網站貼文同上載咗相片，佢兩歲幾嘅囝囝拎咗佢支唇膏，畫到成嘴同雙臂都係紅色唇膏痕，有網友仲留言話佢囝囝玩人體藝術呀！Judy就好肉痛咁話，雖然支唇膏仲用得，但已經無咗一大截，事後佢要拎樽卸妝油，用咗五分鐘幫囝囝清潔。

話最緊要畀小朋友發揮創意

Judy透露，支唇膏二百八十蚊，而且佢不嬲都用開呢款唇膏，呢次只係放低咗喺洗手間，結果就畀囝囝拎走咗。佢話囝囝已經唔係第一次拎佢啲化妝品嚟玩，以前都試過用眼影畫到成面都係鬍鬚咁樣，但就無今次畫到咁誇張。

佢又話今次都算好好彩，因為囝囝無畫到周圍都係，仲話最緊要畀小朋友發揮下創意，所以佢亦都會廢物利用，畀啲紙箱囝囝畫。