政情：林卓廷 何君堯 參觀水炮車罵戰水花四濺

參觀活動開始前，多名泛民議員喺水炮車前抗議警察「濫捕濫權」，何君堯突然衝前，直斥泛民「依家嚟睇水炮車，唔好搞搞震好唔好呀」。

其後有人質疑何君堯「你夠膽講你唔識啲黑社會，唔係叫啲黑社會做嘢」，何君堯就指自己一啲都冇咁樣去做，又質疑法律界議員郭榮鏗識唔識法律，「勾結美國佬，走去做美國嘅走狗，shame on you（以你為恥）」，又話「所有中國人都會唾棄你呀」。

泛民圍攻斥何「唔好做騷」

喺議員就水炮車提問期間，何君堯同泛民再爆發罵戰，場面混亂。何君堯到泛民議員面前，以手機拍攝，並多次重複質問泛民邊個係黑社會，期間被泛民用示威紙張阻擋，何一手扯下紙張並收起。

有人斥何「唔好做騷啦」，林卓廷叫何「唔好撞人」、「你第一人渣行開啦」，又叫何「你去同啲黑社會握手啦」，白鴿黨許智峯（峯鴿）重複話「何君堯係黑社會」。至於公民黨郭家麒就叫何「過主」，人民力量陳志全一度以粗口鬧何君堯，又斥何「搗亂」，令佢哋冇機會問水炮車嘅問題。

林健鋒路過完全冇幫拖

值得一提嘅係，喺咁亂嘅情況下，建制派嘅林健鋒喺人群中路過，但佢好冷靜咁行開，完全冇幫拖。立法會保安事務委員會主席陳克勤就呼籲兩邊議員冷靜，直指若情況持續，會腰斬答問環節。然而混亂情況持續，最終答問環節因此取消。

到底係泛民唔應該喺參觀水炮車時抗議同叫人「黑社會」，定何君堯唔應該衝上前理論呢？真係各人有各人睇法嘞！不過，講真嗰句，參觀水炮車最終搞到立立亂，問唔到水炮車嘅細節，咁就真係失去參觀嘅原意。唔知多幾次呢啲混亂場面，會唔會影響日後搞參觀活動呢？