中環出更：泛民排隊赴美唱衰香港
泛民主派成日去外國大講香港情況，多次遭外界批評係唱衰香港。本月再有泛民立法會議員外訪美國，公民黨立法會議員郭榮鏗同楊岳橋今日出發，去紐約見包括金融界、法律界同美國人權組織人士，其後民主黨議員涂謹申同教育界議員葉建源亦會喺下周一聯同多名建制派議員一同喺蒙大那州與美國國會議員會面，泛民聲稱行程中會提及香港情況。唔知會唔會唱衰香港呢？
郭指今次訪美會清楚、平實、客觀咁講述香港情況，從而為美國喺九月審理嘅《香港人權及民主法》提供正確嘅基礎，仲話唔會影響美國立法喎，但如果美國通過呢條法例，相信加拿大、歐盟都會紛紛效仿。
建制派亦將訪美「抗衡」
佢又話下周一多名建制泛民議員將會同美國國會議員交流，本港會出席嘅建制派議員包括新民黨葉劉淑儀、自由黨鍾國斌，美國方面參加嘅議員暫定有四位，涵蓋兩黨同參眾兩院，分別係Steven Daines、Greg Gianforte、Hank Johnson同Thomas Suozzi。
泛民成日對外話香港有幾咁差，唔知今次會同美國國會議員交流嘅建制派，會唔會乘機唱好香港，抗衡吓佢哋呢？
卓妮