中環出更：佗B冇避忌蔡毅明照着貼身長衫
佗住BB嘅時裝設計師蔡毅明早前拉埋長衫薈嘅姊妹一齊打乒乓球，而即將做第二任媽咪嘅佢，懷孕期間仍選擇以長衫為孕婦裝，佢又話懷孕雖然只係婦女生命中一段好短嘅歲月，但衣着方面仍然唔可以馬虎o架！佢仲話今胎係囡囡，同第一胎嘅囝囝合埋就係一個「好」字，打算為囡囡造番套長衫嬰兒服，咁就可以同佢嘅日常衣着襯到絕嘞！
蔡毅明話東西方婦女對於懷孕嘅衣着，要求略有出入，譬如東方嘅孕婦會偏向着得較為鬆身，西方就流行貼身，而佢就喜歡後者，因為佢身材修長，若穿上蓬鬆嘅服裝，身形就會顯得龐大。至於講求貼身嘅長衫，只要布料具有彈性，作為孕婦服亦未嘗不可。
其實佢積極籌備緊另一場乒乓球賽，而喺長衫薈嘅Facebook亦上載咗好多着長衫打網球同踩滑板等嘅相。長衫薈會員陳淑芝（Cammie）就話愈嚟愈多人明白長衫動靜皆宜，而佢亦見過有客人購買長衫嚟參加郊外行山之類嘅戶外活動。佢話長衫要適合運動場合，最好就係選用彈性布料同度身剪裁，一般而言，只要將長衫嘅衫領稍為修短，經已適合好多種體育場合。佢又話趁暑假將去泰國玩番幾日，而執拾行李嘅時候，長衫當然係必備嘅衣着，因為長衫既適合當地嘅氣候，喺異邦穿上具中國特色嘅衣着，拍照留影亦會特別出眾咁話。
龐愛蘭被讚「美女旗袍王后」
沙田區議員龐愛蘭（Scarlett）都好鍾意着長衫，仲曾經着住長衫去摘龍眼，而佢近日亦騷咗套「傳統×創意」嘅長衫，話用咗馬來西亞嘅布料，背後仲有個蝴蝶結。有網友睇到之後都大讚「中式傳統西式創意，高貴有品味！」亦有網友話佢做咗「美女旗袍王后」添！原來呢套長衫係Cammie親手縫製嘅，而咁有創意嘅蝴蝶結，就係Scarlett同Cammie飲茶時構思出嚟o架！
卓妮