香港衣食住行樣樣貴，但偏偏人工就追極都追唔上通脹，其中交通費佔港人每月唔少開支，未來好大機會百上加斤，事關年初啱啱獲准加價嘅新巴城巴又再申請加價，而且今次加幅高達一成二，基層市民成日都搭巴士，如果今次再獲批加價，對基層影響都咪話唔大。其實政府現時有公共交通費用補貼計劃，外界一直都嫌門檻太高、補貼太少，既然依家已經有補貼系統，睇嚟運輸及房屋局局長陳帆真係要考慮吓由補貼入手，減輕市民壓力，否則啲民怨真係愈積愈多嘞！
