政情：外遊冇啖好食 高叔平回港即體重驟增
香港之所以享有「美食天堂」呢個美譽，並非浪得虛名o架。上海總會副理事長高叔平，早前趁着學校開始放暑假，同太太以及兩個孫仔到美國旅遊度假，結果喺近乎「冇啖好食」嘅情況下，佢一返香港，即盡情享受各種琳琅美食，導致體重驟增，目前要限制自己食少啲澱粉質，希望盡快回復標準體重咁話。
高叔平話，喺美國四處觀光之餘，仲不時留意當地食肆以解決每日三餐，譬如喺三藩市唐人街，佢已經幫襯口碑最好嘅粵菜餐館，不過論烹飪水平就同香港有段距離，至於其他食肆，菜餚水準更可想而知。
赴美陪長孫讀暑期課程
講番今次美國之旅，佢暢遊西岸外，仲前往東岸，陪同長孫到一所中學就讀為期個半月嘅暑期課程。高叔平話，出咗紐約甘迺迪國際機場，還要駕車三小時先至去到舉辦暑期課程嘅中學，實在非常攰，所以課程結束後，陪同返港嘅任務就要由長孫嘅爸爸高鼎國負責喇。