政情：拒開鄰近會堂供居民避暑 趙柱幫斥民政處冷血無情
夏日炎炎，近日氣溫高達三十四度或以上，但一眾住喺沙田博智樓二十至二十五樓嘅居民前晚不幸遇上停電！一百四十四戶居民大汗疊細汗，接獲居民求助嘅沙田區區議員趙柱幫隨即搵沙田民政事務處幫手，要求廿四小時開放鄰近社區會堂，但民政處只肯延長開放另一個距離長達三十二分鐘路程嘅避暑中心。人稱幫主嘅趙柱幫鬧爆民政處冷血無情、麻木不仁，更予以最強烈譴責。
附近大廈有6層樓停電
事緣博智樓廿樓嘅電錶房因供電設施過熱起火而燒毀，影響部分樓層電力，幫主即時搵沙田民政事務助理專員，希望廿四小時開放鄰近社區會堂，畀居民臨時休息，但民政處只叫幫主同居民去避暑中心。幫主就大鬧民政處官僚，話博智樓居民有雙老長者、孕婦、小孩，喺晚上點樣扶老攜幼行到咁遠？
不過，好彩最終有民間幫手，幫主提到有博康邨街坊同酒店經理願意提供協助同租住優惠，亦有教堂開放畀居民，鬧爆代表政府嘅沙田民政處一個電話都冇，「究竟呢個政府、沙田民政處有冇良心？」
