政情：邵家臻在囚三個多月 平均日薪$12.5
究竟在囚人士每日工資有幾多錢呢？因違法佔中案被判囚八個月嘅立法會社福界議員邵家臻，至今於赤柱監獄服刑近三個半月，佢前日（8日）向立法會作出利益申報，首次披露於四月廿四日至七月廿八日期間，合共九十六日，分四次收到懲教署發畀在囚人士嘅工資，總共約一千二百元，平均一日工資係十二元五角。
據邵家臻最新申報資料，佢於在囚期間獲懲教署四次出工資，首次係四月廿四日至五月二日近三十二元，第二次係五月三日至廿六日約一百八十六元，第三次係五月廿七日至六月三十日約四百五十一元，最新一次則係七月一日至廿八日收到約五百三十元工資，呢個係邵在囚期間獲得最多工資嘅一次；而因乜每次收到工資金額都唔同，與邵入獄初期曾入院有冇關係，喺申報中冇交代嘞！
多次申外出被拒
其實邵家臻於在囚期間，一直都動作多多，最為人熟悉係先後多次申請外出到立法會開會被拒，及至近期，仍然在囚嘅佢就自稱有監察政府施政同收到囚友求助，凡此種種，似乎想對外明示暗示，即使自己失去自由，仍然有做好月薪九萬多元嘅議員呢份工，真係信不信由你嘞！