政情：怕開學出事立立亂 楊潤雄休假縮短
香港近月立立亂，交通接連癱瘓，公共設施遭破壞，加上唔少年輕人都加入抗爭行動，情況不斷蔓延，未見有停止迹象。下個月就開學，教育局局長楊潤雄都要縮短三日假，提早喺下周三復工，同各界傾吓開學點安排。聽聞佢要預備開學隨時會出現嘅交通問題、學生情緒問題、不合作運動，包括會否出現罷課罷教等等。其實開學咁緊要，做得問責官員，晨早應該預鬆少少時間啦！
政府尋日刊憲，公布楊潤雄於本月四日至十三日休假，較上周公布少咗三日。教育局話，楊潤雄係因應近日情況，決定縮短休假行程，提早回港喺下周三復工，期間會繼續同同事保持緊密聯繫，跟進事態發展及相關工作。
準備應對各種不明朗情況
據了解，楊潤雄提早放完假係因為面對不明朗情況，局方要加強同業界溝通，提前為新學年作準備，尤其下月初嘅開學日相當重要，近月嘅社會事件同緊張氣氛，隨時影響到交通同秩序，而且臨近開學，都要睇吓學校情況、學生情緒，仲有不合作運動嘅影響，包括準備會唔會出現罷課罷教等，全部都要考慮，因此要同教育界各持份者加強溝通，主要係集中喺中小學及幼稚園，以往只需預早一星期準備開學日，依家就要預早約兩星期。至於大學方面，由於院校自主，就會交由院校自行處理，而多間大學校長已開始接觸學生。
往年開學日都不時出現交通擠塞，依家又有咁多不合作運動，搞到交通經常癱瘓，加上下個月風季都未完結，每次打風交通都好混亂，如果開學日撞啱打風嘅話，嗰種混亂程度，真係諗起都得人驚，真係祝楊潤雄好運嘞！講真嗰句，如果開學日搞到有學生返唔到學，又留喺啲危險地方出晒事，到時佢實被人鬧死，睇嚟依家都係提早返工安排，費事遲吓畀人鬧顧住放假啦！
改動通識科 諮詢至下月中
近日嘅社會亂象，唔少建制派都歸咎於通識科，要求教育局改革，楊潤雄早前曾指，不排除重新考慮通識科係咪必修。據悉，通識科係咪有改動，就冇咁快有任何結果，「學校課程檢討專責小組」嘅相關諮詢要到下月中才完結，預計都要今年底至明年初才交到報告，通識科最終有冇改動、點樣改動，都要視乎報告再作決定。