中環出更：新聞處甩漏多 積金局新高層名都寫錯
政府新聞處一向負責為政府統籌安排傳媒採訪，透過發布新聞稿及相片傳遞政府最新資訊，不過近期新聞處工作表現認真麻麻，繼上月發布新聞稿時刪減傳媒提問惹批評後，今次就連強制性公積金計劃管理局（積金局）委任新高層個名都可以寫錯，搞到要更正。新聞處嘅質素真係每況愈下，真係唔知政府新聞處處長朱曼鈴有冇督緊下屬小心啲嘞！
朱擎知變「朱擎之」
香港近月示威不斷，各界焦點都去晒各區嘅衝擊度，唔知新聞處係咪因而輕視財經資訊，尋日發布財政司司長陳茂波委任朱擎知做積金局嘅新營運總監，任期由本月十九日開始，為期三年。呢一篇普普通通嘅新聞稿，點知就將最重要嘅人名寫錯成「朱擎之」，搞到要再發出修訂版更正錯字咁失威，真係幫倒忙囉。
講真，新聞處甩轆真係愈見頻密，好似上月刪減傳媒提出尖銳嘅提問，就惹來各界抨擊，被質疑自我審查。去年香港基本法委員會主任沈春耀履新後首次訪港時，新聞處又上載錯誤相片而要事後更正，就連政府都喺今年初忍唔住公開大彈傳媒採訪安排問題，新聞處甩轆例子多不勝數，真係求求其其！
卓妮