中環出更：立秋保健預備過冬 施振忠請中醫執番劑「膏方」
立秋啱啱過去，雖然有句說話叫「閒過立秋」，即係過咗立秋就有幾日清閒嘅日子，但站在養生角度而言，立秋其實係保健嘅重要時節。香港善德基金會永遠名譽會長施振忠原來好熟悉中醫中藥，佢尋日出席一個活動時講起自己服用「膏方」多年，仲話懂得養生者，每逢立秋都必定會請中醫按自己嘅體質，執配新一劑「膏方」添。到底咩係「膏方」呢？
施振忠話，江浙一帶嘅人一到立秋，都會搵中醫把脈斷定體質，然後再按唔同嘅身體狀況，執配大批藥材，濃縮煎熬成有如枇杷膏般黏稠嘅「膏方」，繼而儲存至立冬後服用，以便調理身體，迎合季節嘅變化，度過寒冬邁向新歲。
董吳玲玲血氣虛 多年採中醫療法
講番當日嘅活動，其實係善德基金會主席董吳玲玲最近聯同幾位老友，成立文化養生中心，並趁住立秋翌日，搵到一位經驗老到嘅中醫師陳偉為大家把吓脈，逢周五下晝都會駐場添。董太講起，自己從小就有地中海貧血症，血氣偏向虛弱，多年來都採用中醫嘅療法，亦會趁立秋請中醫為佢執配膏方，服用多時發覺頗有成效。佢又指。阿膠同人參等矜貴藥材固然管用，不過迎合季節嘅食材更加重要，所以喺立秋，佢就會用麥冬、淮山同百合等白色食材補肺，既適合又便宜。
陳偉話，春生夏長，秋收冬藏，一踏進立秋，有如小宇宙嘅身體亦由拚勁轉向收斂，起居作息同飲食宜多節制以利養生，中國文化有「悲秋」之說，秋天容易傷感同情緒低落，若果可以保持心境開朗同正能量，身體嘅狀態就會更加理想。講起近日有唔少人吸入催淚煙後唔舒服，陳偉坦言一旦遇上催淚煙等化學物質，中醫嘅針對手段實在好有限，而立秋後應以養肺為主，倘知道某地點會有衝突場面出現，應避免前往，以免吸入呢啲氣體咁話。
卓妮