政情：八網難逃：陳百里再會橄欖仔返「娘家」飲喜酒
近排修例風波不斷，香港經濟下滑，唔少行業都受到波及，但早幾日商務及經濟發展局副局長陳百里仲有時間喺觀塘現身，返「娘家」飲喜酒噃！
「娘家」？咪係佢所屬政黨嘅支部晚宴囉！其實當年身兼立法會議員嘅陳鑑林（橄欖），唔再競逐連任觀塘區議會坪石區議員，交畀屬同一政黨嘅陳百里接棒競逐議席並當選，但因為後來陳百里入咗熱廚房出任商務及經濟發展局政治助理，其區議會嘅議席空缺最終由橄欖個仔陳俊傑（橄欖仔）補選成功，所以今次去觀塘呢個晚宴咪等如返娘家囉！
陳百里亦喺Facebook上載咗幾張大合照，見到當晚橄欖仔都喺度。橄欖仔熱愛音樂，平日得閒仲會寫吓歌、玩吓樂器，當晚見佢拎住個結他，一定有唱番兩首歌助興，大家相聚都應該好開心啦！