政情：八網難逃：曾鳳珠話女性剛中帶柔 棘手問題可迎刃而解
菁英會首個女當家曾鳳珠（Ellen），要領導一個集全港年輕精英嘅組織，確實唔容易。究竟有乜板斧呢？佢就話女性剛中帶柔，比較容易處理棘手嘅問題喎。
壓力就係推動力
Ellen早前接受雜誌訪問，講起話接莊前都好猶豫，擔心點樣可以做到，但有日佢突然諗通咗，覺得團體精神比個人力量更重要，即係話係靠大家，所以佢就答應咗嘞！做會計師嘅佢，壓力經已習以為常，而壓力就係推動力添！
講到女性嘅特質，佢話女性剛中帶柔，或者可以令棘手嘅問題迎刃而解，仲以周星馳主演嘅某套電影為例，話戲中嘅周星馳同劉嘉玲爭吵不休時，劉嘉玲一句：「你餓唔餓？不如我煮個麵畀你食？」佢話女性嘅溫柔，絕對可以紓緩問題嘅。
佢仲自爆咗個小秘密，就係佢一上任就問秘書處攞咗啲執委嘅生日日期。做乜？原來佢係想喺啲執委生日時送上祝福，令到啲執委覺得窩心。