政情：楊雪盈有秘技 講幾粒鐘唔使飲水
今日立秋啦，但係呢排仍然天氣酷熱，唔少人出街都會帶遮帶水，女仔有啲仲要補妝，真係頭痕呀！但灣仔區議員楊雪盈（Clarisse）就話自己有項特別技能，一啲都唔怕，究竟點解呢？
尋日Clarisse出席一個露天活動時，直到完場都冇飲過水，問到有乜嘢特別嘅解暑方法，佢就話自己有個特別技能，就係可以瘋狂講嘢三四個鐘，都唔使飲水。佢仲話出街前就會化好妝，完全唔使喺出面補妝喎。
曬得耐易頭痛
雖然有秘技傍身，但Clarisse話自己曬得耐，係會好容易頭痛（口架）！最嚴重嗰次係中學嗰陣，試過行行吓喺地鐵月台暈低咗，諗起都覺瘀。但係佢話依家唔會再出現咁嘅情況，因為佢嘅團隊知道佢嘅狀況，都會好好照顧佢，活動期間仲好貼心咁畀個風扇仔佢揸手添！佢又話有時行落街周圍巡，啲市民仲會煲啲靚湯畀佢飲，諗起都好sweet喎。