政情：無黨派被冷待 劉其烽斥政策局現實
民主黨（白鴿黨）內訌爆不停，喺舊年底爆發退黨潮。一度盛傳前白鴿、北區區議員劉其烽加入公民黨，但扭扭擰擰做咗半年孤家寡人，佢終於喺上個月正式加盟新民主同盟嘞！問到點解突然決心入黨？劉其烽笑自己「來回地獄又折返人間」，大呻政策局勁現實，特別係發展局，見佢無黨派就冷待佢喎。
上月正式入新同盟
劉其烽承認考慮過加入其他政黨，但佢本身同新同盟北區議員陳惠達有合作，覺得大家理念相同，喺七月加入成為正式黨員，但因為時下局勢冇特別同大家介紹啫。佢亦形容過去半年「獨家村」生活係非常痛苦，憶述做白鴿時，下晝搵政策局問嘢，夜晚就有回覆，相反做獨立民主派時，隨時打電話同電郵都聯絡唔到人，甚至幾個月後先收到一封信話知悉查詢，點名最現實係發展局，依家有新同盟立法會議員范國威幫手，政策局態度又唔同晒。