中環出更：黃之鋒密會美領事 自詡為議員做中間人
近日反修例風波搞到滿城風雨，非建制派一員密密外訪兼同外國領事會面，實在耐人尋味。本報尋日收到讀者報料，話前日喺金鐘一間酒店見到香港眾志秘書長黃之鋒與常委羅冠聰，同美國駐港領事Julie Eadeh「密會」，而黃之鋒同羅冠聰分別回覆查詢時就話，係安排領事到訪立法會同議員會面喎。
表現非常恭敬 如見大老闆
讀者報料就話，前日下晝五點幾見到黃之鋒同羅冠聰對領事表現得「非常恭敬」，好似見到大老闆咁，覺得好不安同憤怒。而黃之鋒尋日喺社交網站回應時就話，前日只係討論《香港人權民主法》嘅立法進程，亦促請美國停止出口催淚彈同橡膠子彈畀香港警察。
黃之鋒又話過去曾到訪華盛頓，直接跟美國議員交流，羅冠聰喺今年五月更曾與美國國務卿會面，認為喺對比之下，今次喺香港同駐港領事交流，根本冇乜特別。
但據了解，本月中立法會有八名議員，包括建制同民主派獲邀往美國見國會議員，直接溝通，唔知連議員都未做到嘅黃之鋒，同被DQ（褫奪立法會議員資格）嘅羅冠聰，憑乜嘢身份去做立法會同議員嘅中間人呢？
卓妮