大媽亂過馬路 巴士車長爆粗
【本報訊】網上近日流傳一段車cam片，一名大媽疑一直在講電話，未有注意路面情況便從路口走出馬路，險被一輛駛來的巴士撞倒。巴士車長立即發火怒罵：「搞×錯啊！」
顧住講電話 幸巴士急煞
事發在前日下午近四時，地點在觀塘。從網民在社交平台上載的影片可見，當時巴士行駛中，一名在講電話的大媽施施然從路邊走出馬路。巴士車長見狀，就立即響按急煞，幸好雙方仍有少許距離，未有發生意外。之後，車長怒罵：「×你老味」、「搞×錯呀」，繼而再打開車門繼續指罵：「你想死啊，想死行遠啲啊！」惟大媽稱：「我唔係過啊！」聽罷車長怒氣仍未平息，續斥：「過咩啫，馬路嚟o架嘛！」最後大媽離開，巴士繼續行駛。
網民轟大媽 「唔好累人」
事件引起網民熱烈討論，有網民大讚「司機好波！」亦有網民批評大媽：「自己條命都唔緊，都唔好累人」、「顧住講電話唔睇路抵死」。有網民則對這類情況感到無奈：「鬧無用o架！」