政情：李家仁上電視 做埋老臨都唔知
兒歌醫生李家仁所創作嘅「小明」系列兒歌，有「上廣州」、「去南極」同「搭高鐵」版本，近來佢似乎又有新搞作。有人就發現佢做埋臨時演員，為某電視劇集扮演冇對白嘅路人角色。不過奇怪嘅係，李一毫子出鏡費都冇收過，到底發生咩事呢？
話說某電視台上個月某一晚播出嘅電視劇集喺尾聲時列出製作人員名單，畫面係若有所思嘅男主角佇足於熙來攘往嘅街頭，而李家仁則從後方嘅人潮中冒出，由遠至近逐步迎向鏡頭，最後李嘅面孔幾乎佔據整個畫面，並以一個凌厲眼神望向鏡頭作結。雖然出鏡時間只得廿多秒，但都有「小明」嘅「粉絲」睇完劇集之後，擷取片段轉發畀李。
不過，李家仁竟然話，到底係幾時、同喺邊度畀電視台攝入鏡頭連佢都唔記得，不過佢只會喺冬天至着背心褸，所以憑片段中嘅衣着推敲拍攝日子應該係舊年最凍嗰幾日。佢又話，相信攝影師並非刻意將佢攝入鏡頭，佢事後亦完全冇收過通知。到底係電視台人員冇留意，定係李嘅知名度有待提升呢？