中環出更：劉江華現身室內龍舟賽 屏幕即無法連接
今屆政府強調「We Connect」，但近日發生一連串示威行動，完全睇唔到政府點樣同市民Connect，同樣嘅事件亦發生喺民政事務局局長劉江華身上！事緣尋日係全民運動日，劉都有現身同市民參與運動，但當佢觀看室內龍舟競賽嗰陣，顯示參賽者嘅電子屏幕突然「Hang機」，顯示「Lost connection……」，真係好諷刺喎。
每年八月第一個星期日，康樂及文化事務署定為「全民運動日」，將轄下嘅康體設施都開放畀市民用，今年已經踏入第十一年喇！劉江華同康文署署長李美嫦尋日下晝出席「全民運動日2019」活動，劉仲同市民玩健體操，好似好吃力咁，唔知係咪近日太多嘢做，令佢做到透唔到氣！
劉離開後即回復正常
但最尷尬嘅係，當佢去到觀看室內龍舟競賽運動嗰陣，顯示各參加者成績嘅電子屏幕突然「Hang機」，顯示「Lost connection……」，只能透過工作人員講解邊位參加者扒得最快，十分無奈。最搞笑嘅係當佢離開之後，嗰部電子屏幕又回復正常，唔知係咪連電子機器都唔鍾意佢呢？
卓妮