中環出更：吳宏斌最愛費達拿 大讚形象健康脾氣好
早前喺一個體育活動上遇到香港中華廠商會會長吳宏斌，同佢講開運動，原來佢都有打開網球。問佢鍾意邊個網球球星，佢就話全世界都鍾意瑞士嘅「費天王」費達拿喇！
吳宏斌話費達拿打比賽輸贏係一回事，但費達拿無論係比賽態度、風格以至體育精神上都好好，加上形象健康同正面，個人冇咩脾氣，對啲球迷又熱情。佢又話喺打網球嚟講，以前三十幾歲嘅人係好難贏冠軍，但依家嘅訓練令到好多人嘅職業生涯都可以打得耐啲，但英國球手梅利始終都經歷過幾嚴重嘅傷患，好難回復番以前嘅體力，如果少啲體力嘅話，係應付唔到劇烈嘅運動比賽。
佢好老實咁話，自己都上咗年紀，所以近年就轉戰廠商會工商盃、盛年組嘅賽事，仲拎過一、兩次冠軍添，但上年嘅成績就麻麻哋，不過都唔緊要啦，有做運動鍛煉身體對任何年紀嘅人嚟講都係好事。
黃偉鴻偶爾返內地打高球
轉頭見到副會長史立德、黃震、吳國安、常務會董李慧芬、會董黃偉鴻同菁英會副秘書長潘偉業等。黃偉鴻話平日都有打高爾夫球，大多都係喺內地場打，同生意夥伴一齊玩吓，若果咁啱要公幹就會攞埋啲高爾夫球裝備一齊去。
咁佢又鍾意邊位高爾夫球星呢？佢話其中一個係Tiger Woods（老虎），佢話雖然老虎受到傷患同一啲醜聞影響，聲譽同比賽嘅表現都大不如前，之但係佢最近都攞咗個賽事冠軍，顯示佢係好努力咁追前嘅，打逆境波係好難嘅事，所以佢認為最緊要喺邊度跌低，就要喺邊度起番身。
卓妮