政情:梁耀忠除低頸箍 話戴咗對肌肉無咁好

立法會議員梁耀忠條頸有事,幾個月以來都一直戴頸箍出席公開場合,不過,佢近幾日多次出席公開活動都冇戴頸箍,就連日前大批示威者包圍葵涌警署,佢現身時都冇戴,唔通已經好番?梁耀忠回覆指,原來係私家醫院嘅骨科醫生叫佢唔使成日戴住個頸箍,因為咁樣會對肌肉無咁好喎!

曾被示威者抱走 加劇傷患

梁耀忠引述醫生話,依家要等啲肌肉放鬆吓,只需要間唔中戴番個箍,穩固條頸。翻查資料,梁耀忠今年三月尾起已經戴住個頸箍,當時佢就話,頸骨有一節輕微移咗位,中醫師幫佢推番正啲骨,為免出街容易有碰撞而再受傷,叫佢出街要戴頸箍保護。計計吓,原來佢都戴咗四個幾月,依家先發現唔使成日戴,睇嚟之前都係白白戴多咗一排嘞!

值得一提嘅係,立法會大樓上月被示威者衝擊期間,梁耀忠曾被示威者橫身抱走,搞到佢頸患加劇,之前葵涌警署咁亂,佢都唔戴頸箍就過去,認真大膽!不過點都好,祝佢身體健康、早日康復啦!

第一手消息請下載on.cc東網iPhone/iPad/Android/Windows Phone Apps