政情：八網難逃：打風做乜好？陳家珮教仔整餅
打風梗係留喺屋企最安全啦！南區區議員陳家珮（Judy）打風嗰日喺社交網站貼咗幾張相，係同囝囝一齊整餅，紮住噴泉辮嘅細女仲攞住塊餅含落口添，真係隔住個螢光幕都感覺到有幾香，兩個小朋友仲相當可愛添！Judy貼文話打風巡完區，困喺屋企又唔想睇新聞，惟有同阿仔整吓餅啦，仲話阿女有口福添！
Judy回覆話當日同阿仔一齊整麥片提子乾曲奇餅，自己整就夠晒低糖，其實平時都好鍾意整嘢食，屋企有齊工具，材料又簡單，打開雪櫃就有，唯一係成日都冇時間整，今次趁打風就同阿仔一齊整吓嘢食，約一個半鐘就整完。佢又話，今次同阿仔整嘢食，最重要係想教阿仔，每件事要有成果需要經過一番努力，亦要有一個過程，正如並非用錢買就可以有曲奇餅，曲奇餅都要有製造過程才能出現嘅。
7個月大囡囡爭住食
佢話阿仔只係得兩歲半，但一向都好鍾意幫手做嘢，今次就有幫手倒吓材料之類，玩得好開心，而囡囡七個月大，其實未有牙，但太為食，攞住塊餅舔舔吓，不過囡囡為食都好o架，比起阿仔七個月大時就明顯大隻啲，仲要天生腳長添！聽落囡囡可能第日係高妹喎。