政情：議辦物資供反修例遊行 趙柱幫被指違規
唔少區議員嘅辦事處都會存放物資，有時會用嚟搞大型活動用。近排唔少市民會每個星期自發搞示威遊行，仲要分散晒十八區去搞，眼見市民未必會有經驗，好多時區議員都會幫下手。但沙田區議員趙柱幫喺上月十四日沙田大遊行時幫居民運送物資，點知就有市民向沙田民政事務處投訴喎。
話將捐贈品運到物資站
話說趙柱幫前日收到沙田民政事務處嘅信，話有市民投訴上月十四日，佢將議員辦事處嘅物資用咗喺當日嘅大遊行上，質疑做法係咪違反區議員辦事處嘅使用規定。根據民政處嘅信，佢哋要求趙柱幫喺下周五前提交聲明，要佢確認是否符合區議會指引。
趙柱幫就喺Facebook反駁，指當日嘅遊行係有不反對通知書，而事緣係有沙田居民將水、退熱貼同毛巾捐助到辦事處，所以佢就幫手運到物資站，認為明顯冇違反區議員指引。佢仲批評沙田民政處不知所謂，連無聊嘅投訴都接受，講明考慮唔回覆投訴信，仲反而建議佢哋應處理上月二十五日沙田區議會會議嘅安排，包括容許建制派人士一早進入旁聽席、主席宣布休會後冇折返會議室宣布流會、拒絕記者採訪。