政情：梁栢賢退休即開波

玩齊籃球足球羽毛球

PY前日退休，咁啱颱風「韋帕」襲港掛八號波，佢喺Facebook貼文話「退休係時候開波啦！」離開咗醫管局仲同邊個開波？跟住睇到張相，見佢揹住袋波喎，真係好多波，仲係唔同嘅波，包括籃球、足球同羽毛球等等，原來佢講嘅開波，係打波呀！

呢個Post出街後，有網友仲同韋帕扯上關係，話「係咪8號波……！」另有網友話「今日未落波，唔可以開波啦！」亦有唔少網友相約佢打番場較量下，有網友更加話「乜球都啱你喎，多才多藝！管理好身體健康，享受黃金歲月」，當中亦有人叫佢學打高爾夫球添！講波之餘，唔少網友都祝願佢有個開心嘅退休生活。

老實講，PY早前喺Facebook都話過往一段時間去一啲足球賽，都係做開球禮，好少落場踢波，又話退休後希望多啲落場踢，依家咁多網友約佢打波，睇怕佢都要操番一輪備戰嘞！