中環出更：教師投訴促釘牌 鄺俊宇或甩身

蘇子冠尋日亦電郵香港個人資料私隱專員公署，質疑註冊局要求佢提供實質性聯絡地址，陷佢嘅人身安全而不顧，質疑註冊局呢個強制要求嚴重違反個人資料私隱嘅法例，要求私隱署盡快展開調查。

蘇子冠日前將投訴鄺俊宇嘅表格寄掛號畀註冊局，大罵阿Roy係幫兇同衝擊法治，亦係參與暴動同非法集結，狠批阿Roy身為社工公然支持暴徒襲警，唔單止令社會震驚，亦係全港社工之恥，仲涉嫌違反社工專業操守同守則，要求社工註冊局即刻釘阿Roy個社工牌。

因為蘇子冠冇畀地址

註冊局尋日以電郵回覆蘇子冠嘅信件就話，根據《社會工作者註冊條例》訂明，投訴人下落必須可以追查，要求蘇子冠提供「實質性聯絡地址」。而蘇就話自己向多個部門投訴都係留電郵，而喺網絡欺凌嚴重嘅世代，交地址就係不顧佢安危，反罵註冊局係擔心自己人查自己人問題喎。誰是誰非，清官都難審，但實際結果可能係阿Roy因而得福，或可以甩難。

卓妮